’n Liefdesverhaal wat begin op ’n skoolbus… In 2017 het Ané en Bernand se paaie mekaar gekruis — nie by ’n romantiese ete of ’n deftige partytjie nie, maar op ’n besige skoolbus tydens ontgroening. Ané, toe ’n graad 8’tjie, was alles behalwe skaam: met haar geel geverfde kolle, sewe poniesterte, ’n swart getande glimlag en haar laerskool-drag so bietjie agterstevoor, het sy heel voor in die bus gesit. Sonder om twee keer te dink het sy die seniors, heel agter in die bus, laat weet dat die Jack Parrow-musiek (op daardie stadium van haar lewe) glad nie van pas is nie. Bernand, ’n senior op daardie stadium, het dadelik opgespring — gereed om hierdie dapper graad 8-dogtertjie stil te maak en haar te laat verstaan dat ’n mens op die bus eerder gesien as gehoor moet word. Maar toe gebeur iets onverwags… Sy Bruin oë ontmoet hare, geel kolle en al, en net daar sak hy terug in sy sitplek. Die musiek word verander — en hy kondig sommer vir sy vriende aan dat hy eendag met hierdie dogtertjie gaan trou. En kyk nou net — 9 jaar later het die bus stilgehou, die musiek verander… maar die liefde het gebly.